Universitetlərə Qəbul Xidmətinin (UCAS) rəhbəri Dr. Jo Saxton bildirib ki, bu il Britaniyada 18 yaşlı abituriyentlərin birinci seçimləri olan universitetlərə qəbul olunma ehtimalı əvvəlki illərə nisbətən daha yüksəkdir. Hətta bəzi hallarda tələb olunan balları az fərqlə keçməyən namizədlər də qəbul oluna biləcəklər.
"Tehsil365" BBC-nin yaydığı məlumata istinadən xəbər verir ki, bu vəziyyətin əsas səbəbi, universitetlərin beynəlxalq tələbələrin sayında qeyri-müəyyənliklə üzləşməsi və buna görə də yerli tələbələrə daha çox üstünlük verməsidir. Yerli tələbələr, universitetlərin maliyyə sabitliyi üçün “etibarlı planlama” elementi hesab olunur.
Bu il A-level, T-level, BTEC və digər imtahan nəticələri açıqlanmağa hazırlaşarkən, tələbə qəbulu ilə bağlı gözləntilər də artır. Saxton qeyd edib ki, bu il Böyük Britaniyada universitetə qəbul üçün əlverişli bir il olub: “Rekord sayda gəncin arzularındakı universitetə qəbul olacağını düşünürəm.”
Universitetlər arasında rəqabətin yüksək olduğu bu il ərzində daha çox tələbəyə təklif göndərilib ki, bu da qəbul sayında artım deməkdir. Boş yerlərin isə az olacağı gözlənilir, çünki təklif edilən yerlər daha tez dolacaq.
Hazırda UCAS-ın dəyişdirmə sistemi vasitəsilə tələbələr boş qalan yerləri axtara bilirlər. Son analizlərə görə, ölkədə 22 mindən çox proqram üzrə boş yerlər mövcuddur. Hətta nüfuzlu Russell Group universitetlərində belə 3.600-dən çox dərs üçün vakansiyalar var.
Yüksək Təhsil Siyasətləri İnstitutunun direktoru Nick Hillman da bildirib ki, bu il abituriyentlər istədikləri təhsil müəssisəsinə daxil olmaq üçün əlverişli şəraitdədirlər. Universitetlər maliyyə çətinlikləri səbəbindən yaxşı tələbələri cəlb etmək üçün daha açıq siyasət yürüdürlər.
Eyni zamanda, Böyük Britaniyada təhsil haqqı 2017-ci ildən sonra ilk dəfə artırılıb – 2025–26-cı tədris ili üçün bu məbləğ 9.250 funtdan 9.535 funta yüksəldilib. Bununla yanaşı, yaşayış xərclərini qarşılaması üçün tələbələrə verilən təqaüdlər (baxım kreditləri) də artıb. Məsələn, Londondan kənarda yaşayan tələbələr üçün maksimum kredit məbləği 10.227 funtdan 10.544 funta qaldırılıb.
Son statistikaya əsasən, bu il İngiltərədə universitetlərə müraciət edən 18 yaşlı abituriyentlərin sayı 328.390 nəfərə çatıb. Lakin ümumi əhali artdığı üçün bu göstərici faiz baxımından ötən illə müqayisədə bir qədər aşağıdır.
İngiltərə, Uels və Şimali İrlandiyada tələbələr qarşıdakı həftə yekun qiymətlərini alacaqlar. İskoçiyada isə nəticələr artıq açıqlanıb və akademik nailiyyətlərdə bölgələrarası fərqin azaldığı bildirilir.