İngiltərə hökuməti, uşaqları və gəncləri smartfon və kompüter ekranlarından uzaqlaşdırmaq məqsədilə məktəbdənkənar fəaliyyətlər və gənclər klublarına 88 milyon funt sterlinq maliyyə yardımı ayıracaq. Bu təşəbbüs Baş nazir Keir Starmer tərəfindən elan edilib.
"Tehsil365" xarici mənbələrə istinadən xəbər verir ki, yeni paket çərçivəsində gənclərə idman, açıq hava fəaliyyətləri, incəsənət, musiqi, debat və könüllülük kimi sahələrdə iştirak imkanı yaradılacaq. Starmer, gənclərin evə qapanmış və cəmiyyətlərindən uzaq düşməsinin narahatedici tendensiya olduğunu bildirib və bu fondun onlara “heç bir alqoritmin öyrədə bilməyəcəyi” özünəinam və həyat bacarıqları qazandıracağını qeyd edib.
88 milyon funtun 22,5 milyonu birbaşa olaraq üç il ərzində 400 məktəbdə dərsdənkənar tədbirlərin təşkili üçün ayrılacaq. Qalan 65,5 milyon funt isə daha əvvəl elan olunmuş vəsaitin tərkib hissəsidir. Bu vəsait daha çox yoxsulluğun və antisosial davranışların müşahidə olunduğu bölgələrdə gənclər klublarının infrastrukturunun yaxşılaşdırılmasına, idman avadanlıqlarının və fəaliyyət sahələrinin qurulmasına sərf ediləcək.
Bundan başqa, yerli idarəetmə orqanlarına keyfiyyətli məktəbdənkənar fəaliyyətlər təqdim etmələri üçün dəstək veriləcək. Eyni zamanda, İzciler, Bələdçilər və Könüllü Polis Kadetləri kimi təşkilatlarda minlərlə yeni yer açılacaq.
Statistikaya görə, 2012–2023-cü illər arasında yerli idarələrin idarə etdiyi gənclər mərkəzlərinin sayı demək olar ki, yarıya enib, bu sahəyə ayrılan büdcə isə 75% azalıb. Bu isə 4.500-ə yaxın gənclər işçisinin işini itirməsi ilə nəticələnib.
UK Youth adlı ölkənin ən böyük gənclərlə iş üzrə xeyriyyə təşkilatı hökumətə təcili olaraq maliyyə dəstəyini artırmaq çağırışı etmiş və indiyədək İşçi Partiyasının bu sahəyə Mühafizəkar Partiyadan daha az vəsait ayırdığını bildirmişdi.
Hökumət rəsmiləri bu ilin payızında yeni milli gənclər strategiyasını ictimaiyyətə təqdim etməyə hazırlaşır. Mədəniyyət naziri Lisa Nandy isə bildirib: “Güclü yerli gənclər xidmətləri gənclərimizə öyrənmək, inkişaf etmək və potensiallarını reallaşdırmaq üçün təhlükəsiz mühit təmin edir.”