Pandemiya dövründə Çinli tələbələrin xaricdə təhsil imkanlarının məhdudlaşmasına az adam uzunmüddətli təsir kimi baxsa da, son aylarda toplanan statistika fərqli bir mənzərə ortaya qoyur. Əvvəllər yay aylarında IELTS və TOEFL hazırlığı üçün böyük maraq göstərən tələbələrin sayı bu il demək olar ki, yox səviyyəsinə enib.
"Tehsil365" Times Higher Education-un yaydığı məlumata istinadən xəbər verir ki, təhsil mərkəzləri və universitet qəbul şirkətləri ötən illə müqayisədə ciddi azalma olduğunu bildirir. Hətta xaricdə təhsilə ən çox tələb olan Şanxay kimi şəhərlərdə belə, təhsil sərgilərinə maraq xeyli zəifləyib. Mütəxəssislər bu azalmada geosiyasi gərginliklər, viza məhdudiyyətləri və Çin yerli universitetlərinin inkişafını əsas amillər kimi göstərsələr də, ən önəmli səbəb kimi iqtisadi geriləməni vurğulayırlar.
Çin iqtisadiyyatının uzun illər əsas dayaq nöqtəsi olan daşınmaz əmlak bazarındakı kəskin eniş və Covid-19-un təsirləri orta təbəqənin gəlirlərini ciddi şəkildə azaldıb. Nəticədə, orta təbəqə ailələrin xaricdə təhsilə ayırdığı maliyyə imkanları məhdudlaşıb.
Bununla belə, magistratura səviyyəsində xarici universitetlər hələ də müəyyən maraq görür. Xüsusilə Hong Kong, Sinqapur, Malayziya və Makao kimi yaxın regionlar, həm münasib təhsil haqları, həm də yüksək təhsil keyfiyyəti ilə seçilir.
Ekspertlər yaxın gələcəkdə Çinli tələbələrin xaricdə təhsil alma sayının 25 il əvvəlki səviyyəyə qədər azalacağını, yalnız seçilmiş elit qrupun bu imkandan istifadə edə biləcəyini proqnozlaşdırırlar. Lakin tələbə sayının azalması həm yerli, həm də xarici universitetləri təklif və xidmətlərini təkmilləşdirməyə, həm də təhsil haqlarını daha əlverişli səviyyəyə endirməyə təşviq edə bilər.