Böyük Britaniyada beynəlxalq tələbələrin təhsil haqlarına tətbiq olunması planlaşdırılan 6% əlavə vergi ali təhsil sektorunda ciddi narahatlıq yaradıb. Müstəqil tədqiqatçı Mark Fothergill və Ali Təhsil Siyasəti İnstitutu (HEPI) bildirirlər ki, bu vergi ölkənin universitetlərinin beynəlxalq rəqabət qabiliyyətini zəiflədə bilər.
"Tehsil365" xəbər verir ki, bu barədə The Pie News məlumat yayıb. Analizlər göstərir ki, ən böyük maliyyə itkiləri xarici tələbələrin çox olduğu iri şəhər universitetlərinə təsir edəcək. Məsələn, gəlirlərinin 79%-ni xarici tələbələrdən əldə edən University College London (UCL) 42 milyon funt sterlin, Manchester Universiteti 27 milyon, King’s College London isə 22 milyon funt sterlinlik itkilə üzləşə bilər. Ümumilikdə isə 19 universitet ən azı 10 milyon funt zərər çəkəcək.
Universitetlər qarşısında iki seçim dayanır: ya əlavə vergi xərclərini tələbələrə yükləyib rəqabətdə geri qalmaq, ya da bu xərcləri öz büdcəsindən ödəyərək tədris və tədqiqat vəsaitlərini azaltmaq. HEPI rəhbəri Nik Hillman bu vəziyyəti "sektorun üzərində ağır kölgə" kimi qiymətləndirib.
Hökumət bildirir ki, vergi yerli icmalara iqtisadi töhfəni göstərmək məqsədi daşıyır, lakin toplanan vəsaitin təhsilə qaytarılıb-qaytarılmayacağı və necə xərclənəcəyi hələ də aydın deyil. Sektor nümayəndələri isə artıq maliyyə çətinlikləri ilə üzləşən universitetlər üçün bu verginin əlavə yük olmasından narahatdır.
Rəsmi məlumatlara görə, 2025/26-cı ilədək təhsil müəssisələrinin 72%-i maliyyə itirə və ümumi sektor açığı 1,6 milyard funt sterlinə çata bilər. Bununla yanaşı, hökumət magistratura vizalarının müddətini iki ildən 18 aya endirməyi və uyğunluq yoxlamalarını sərtləşdirməyi də planlaşdırır.
Bu dəyişikliklərin Böyük Britaniyanın beynəlxalq təhsil bazarında sabitlik imicinə necə təsir edəcəyi isə hələ sual altındadır.