Təxminən üç il əvvəl binada keyfiyyətsiz betonun aşkar edilməsindən sonra, xüsusi ehtiyaclı şagirdlər üçün məktəbin yenidən tikilməsi və genişləndirilməsi işlərinə başlanıb.
Somerset, Taunton şəhərində yerləşən Selworthy Məktəbi xüsusi təhsil ehtiyacları və əlilliyi (SEND) olan uşaqlara xidmət göstərir.
"Tehsil365" BBC-nin verdiyi məlumata istinadən xəbər verir ki, məktəbi idarə edən Oak Partnership Trust 2022-ci ilin avqustunda məktəbin Oakhill kampusunda “təhlükəsiz olmadığı” təsdiqlənən və “gücləndirilmiş avtoklavlanmış qazbeton” (RAAC) adlı materialın geniş istifadə olunduğunu aşkar edib.
Məktəbin SEND üzrə mütəxəssisi Luis Endryus bildirir ki, yenidənqurma işləri uşaqlar arasında daha çox dəstək tələb edənlərin sayının artması səbəbindən bələdiyyənin büdcəsinə təzyiqi azaltmaq məqsədi daşıyır.
Layihə çərçivəsində mövcud sinif otaqları təmir ediləcək və əlavə 24 şagird yeri yaradılacaq.
Endryus əlavə edib: “Bələdiyyə SEND üçün yetərli şərait yaratmaq məsuliyyətində olsa da, yeni məktəblərin açılması üçün qanuni səlahiyyəti yox idi. Tələb artımı və boş yerlərin azlığı bələdiyyənin ‘ilk yerli məktəb’ siyasətinə təsir edib, nəticədə bəzi uşaqlar öz ehtiyaclarını qarşılayan xüsusi məktəblərə getmək üçün uzun yol qət etməli olub.”
Somerset bələdiyyəsi layihəyə 1,7 milyon funt sterlinq ayırıb.
Yeni məktəbin 2026-cı ilin sentyabrında fəaliyyətə başlaması planlaşdırılır.
RAAC 1950-1990-cı illər arasında əsasən düz damlarda, həmçinin döşəmə və divarlarda istifadə olunan yüngül tikinti materialıdır. Standart betona nisbətən daha ucuz, istehsalı sürətli və quraşdırılması asandır.
RAAC-a dair narahatlıqlar İngiltərədə artıq 100-dən çox məktəbin tam və ya qismən bağlanmasına səbəb olub.
Ekspertlər bildirirlər ki, bu materialdan istifadə olunan çoxsaylı dövlət binaları hazırda çökmə riski ilə üz-üzədir.