Hər il 9 avqustda qeyd olunan Dünya Yerli Xalqlar Günü münasibətilə, Québec Həmkarlar İttifaqları Mərkəzi (CSQ) yerli icmaların təhsil sahəsindəki problemlərini diqqətə çatdırıb.
"Tehsil365" Education İnternational-a istinadən xəbər verir ki, CSQ nümayəndəsi İzabel Tremblay Şevalyenin sözlərinə görə, Québecdə yerli xalqlar uzun illər assimilyasiya və kənarlaşdırma siyasətinin təsirində qalıb. 20-ci əsrin sonuna qədər fəaliyyət göstərən internat məktəblər yerli dillərin və mədəniyyətin sıradan çıxmasına, nəsildən-nəsilə ötürülən travmalara səbəb olub.
Bu gün də yerli məktəblərdə mədəniyyətə uyğun tədris materiallarının çatışmazlığı, dil itkiləri və yüksək məktəb tərk etmə göstəriciləri əsas problemlərdir. CSQ bu istiqamətdə bir sıra addımlar atır – yerli dillərin tədrisə daxil edilməsi, müəllimlər üçün maarifləndirici platformalar, Cree və Inuit icmalarında çalışan pedaqoqlar üçün bələdçilər hazırlanması və yerli şagirdlər üçün təqaüd proqramları bunlara daxildir.
İttifaq, həmçinin təmiz suya çıxış problemi ilə bağlı kampaniyalar aparır. Québec və Kanadadakı bir çox yerli icma hələ də içməli suya çıxışdan məhrumdur ki, bu da sağlamlığa və təhsilə ciddi təsir göstərir. CSQ “Su hüququ: bu çox təbiidir!” adlı milli kampaniya çərçivəsində hökumətlərə minlərlə müraciət göndərib.
Təşkilat yerli xalqlar üçün daha ədalətli və bərabər təhsil mühitinin yaradılması istiqamətində fəaliyyətini davam etdirməyi planlaşdırır.