Karnataka dövlətinin təhsil siyasətində köklü dəyişikliklər gözlənilir. Baş nazir Siddaramaiah-a təqdim edilən hesabatda, 2020-ci il Milli Təhsil Siyasətindən fərqli olaraq, bölgənin sosial, mədəni və iqtisadi xüsusiyyətlərinə uyğunlaşdırılmış islahatlar yer alıb.
"Tehsil365" The Indian Express-in yaydığı məlumata istinadən xəbər verir ki, islahatlar çərçivəsində, məktəb proqramlarının yerli dillərə uyğunlaşdırılması, xüsusi məktəbəqədər müəssisələrin tənzimlənməsi və yeni nəzarət orqanlarının yaradılması nəzərdə tutulur. Təhsil sistemi 2 il məktəbəqədər, 8 il ibtidai və 4 il orta məktəb olmaqla yenidən strukturlaşdırılacaq. Tədris dili olaraq 5-ci sinfə qədər Kannada və ya yerli dil istifadə ediləcək.
Eyni zamanda, dövlət təhsilin maliyyələşdirilməsini artıraraq büdcənin 30%-ni təhsilə yönəltməyi, təhsil haqqı ödəyə bilməyənlər üçün təqaüdlər və kredit imkanları yaratmağı planlaşdırır. Ali təhsildə isə 3+2 və 4+2 modelləri tətbiq olunacaq, iki dilli tədris təşviq ediləcək.
Yerli icmalarda təhsilin inkişafı, müəllimlərin peşəkar hazırlanması və təhsil müəssisələrinin idarəçiliyinin təkmilləşdirilməsi istiqamətində də addımlar atılacaq. İslahatlar tam tətbiq edildikdə, Karnataka təhsil sistemində həm keyfiyyət, həm də əlçatanlıq sahəsində əhəmiyyətli irəliləyişlər gözlənilir.