Dünya süni intellektin sürətlə yayıldığı, kod yazmadan səhv aradan qaldırmaya qədər bir çox işin alqoritmlərə həvalə edildiyi dövrdən keçir. Lakin Hindistanda mühəndislik məzunlarının təxminən 80 faizi işsiz qalır, yarısından azı isə iş tapa bilir. Mütəxəssislər bunun əsas səbəbini köhnəlmiş tədris proqramı və praktiki bacarıq çatışmazlığı ilə izah edirlər. Ünlü alim CNR Rao-ya görə, ölkənin mühəndislik müfredatının 90 faizi artıq aktual deyil.
"Tehsil365" Education Times-in yaydığı məlumata istinadən xəbər verir ki, 2023-cü ildə Kerala mühəndislik fakültələrində aparılan yoxlama nəticəsində 3 min müəllimdən min nəfərdən çoxunun əsas tədris bacarıqlarına malik olmadığı üzə çıxıb. Bir çox tələbə isə heç bir staj keçmədən məzun olur, yalnız 36 faizi dərsdənkənar layihələrdə iştirak edir.
Mütəxəssislər bildirirlər ki, müasir sənaye dar ixtisaslaşmış kadrlardan çox, həm texniki, həm də idarəetmə, ünsiyyət və dizayn bacarıqlarına sahib “tam donanımlı” mütəxəssislərə ehtiyac duyur. Bu, yalnız mövcud işlərə deyil, yeni iş sahələri yaratmağa qadir mühəndislərin yetişdirilməsini tələb edir.
Bəzi universitetlər artıq tədrisdə dəyişiklik edərək tələbələri ilk gündən real layihələrə cəlb edir – süni intellekt sistemləri, robototexnika, dayanıqlı texnologiyalar. İnovasiya laboratoriyalarında tələbələr təkcə kod yazmır, həm də sağlamlıq diaqnostikası, ağıllı şəhər həlləri və yeni nəsil robotlar kimi məhsullar hazırlayırlar.
Mütəxəssislərin fikrincə, dördillik diplomun uğuru müəyyən etdiyi dövr bitib. Gələcək, fasiləsiz öyrənən, risk alan və məqsədyönlü şəkildə yaradan insanlara məxsusdur. Tam donanımlı insan dövrü artıq başlayıb.