ABŞ Təhsil Nazirliyinin tələbə krediti ilə bağlı şikayətləri araşdıran Ombudsman Ofisində işçi çatışmazlığı səbəbindən 27 minə yaxın müraciət yığılıb. NBC News-un əldə etdiyi məlumata görə, nazirlik bu vəziyyəti 21 iyulda senator Elizabeth Warren-a göndərdiyi məktubda açıqlayıb.
"Tehsil365" NBC News-ə istinadən xəbər verir ki,ofis hər həftə kredit ödənişləri, maliyyə yardımı fırıldaqları və digər problemlərlə bağlı yüzlərlə şikayət qəbul edir. May ayında cəmi 1.100-dən bir az çox müraciət həll edilib ki, bu da yığılmanın artmaqda olduğunu göstərir. Senator Warren, Təhsil naziri Linda McMahon-a ünvanladığı məktubda, işçilərin kütləvi ixtisarı fonunda nazirliyin əsas funksiyalarını necə icra etdiyinə dair cavab tələb edib və 20 avqusta qədər izahat istədiyini bildirib.
Trump administrasiyası nazirliyi bağlamağı planlaşdırır və bu məqsədlə 1.400-dən çox əməkdaş işdən çıxarılıb. Ombudsman ofisində işçi sayı il ərzində 63-dən 25-ə enib. Mart ayında 16 min olan şikayət sayı iyunun sonunda 27 minə çatıb.
Ekspertlər, bu vəziyyətin borcluların ödəniş problemlərinə, artıq ödənişlərə və kredit hesablamalarındakı səhvlərə vaxtında cavab ala bilməməsinə səbəb olduğunu deyirlər. Bundan əlavə, azalan işçi heyəti ümumi problemləri müəyyənləşdirmək imkanlarını da məhdudlaşdırır.
Nazirlik isə dəyişikliklərin məqsədinin prosesləri daha səmərəli və qanuna uyğun şəkildə sadələşdirmək olduğunu açıqlayıb. Lakin Warren, rəhbərliyin kredit müraciətlərini sürətləndirmə planlarının “çox qeyri-müəyyən” olduğunu vurğulayıb.