ABŞ-ın Nyu-Cersi ştatının Camden şəhərində yerləşən LEAP Academy University Charter School-da valideynlərdən tədris ili ərzində 40 saat könüllü fəaliyyət göstərmələri xahiş olunur. Məktəb rəhbərliyi bunun ailə–məktəb əlaqələrini gücləndirdiyini, valideynlərin ehtiyaclarını daha yaxşı anlamağa kömək etdiyini bildirir. Valideynlər isə bu modelin onlara məktəb tədbirlərində daha çox söz haqqı verdiyini və qarşılıqlı etimadı artırdığını deyirlər.
"Tehsil365" K-12 DİVE-ə istinadən xəbər verir ki, könüllü fəaliyyətlərə kitab oxumaq, xüsusi tədbirlərin təşkili, ianə toplamaq, valideyn seminarlarına qatılmaq, komitələrdə işləmək və məktəb layihələrinə dəstək vermək daxildir. Məktəb, ailələrin vaxt məhdudiyyətlərini nəzərə alaraq, proqramı daha çevik şəkildə tətbiq edir. 40 saatı tamamlaya bilməyən valideynlərin övladlarının yerini itirməsi riski yoxdur.
1997-ci ildə yaradılan məktəb, valideyn iştirakını prioritet hesab edir. Həftəlik təşkil edilən seminarlar valideynlərə ev idarəsi, ingilis dili, iş tapmaq, sağlam qidalanma və texnologiya kimi sahələrdə ödənişsiz təlimlər təqdim edir. Təlimlər zamanı axşam yeməyi, uşaq baxımı və parkinq də pulsuzdur.
Məktəbin əməkdaşlarının 10–15%-i hazırkı və ya keçmiş tələbələrin valideynləridir. Rəhbərlik bunun həm ailələrə iqtisadi üstünlük verdiyini, həm də şagirdlərin məktəbdə daha yaxşı davranış sərgiləməsinə səbəb olduğunu vurğulayır. Valideynlər isə bu yanaşmanın təkcə övladlarını deyil, özlərini də inkişaf etdirdiyini bildirirlər.