Universitet və ya kollecə hazırlaşan tələbələrin əsas düşündüyü məsələlərdən biri noutbuk seçimidir. Son illərin tədqiqatları göstərir ki, tələbələr arasında MacBook istifadəsi xeyli artıb. UC Davis universitetinin 2023-cü il sorğusuna görə, tələbələrin yarıya yaxını tədrisdə əsas cihaz kimi məhz MacBook-dan istifadə edir.
“Tehsil365” xəbər verir ki, bununla belə, seçim edərkən diqqət edilməli məqamlar var. Ən önəmlisi qiymətdir. Hazırda ən ucuz MacBook Air 13 düym ölkəmizdə təxminən 2 499 AZN-ə satılır. Daha güclü MacBook Pro 14 düym isə 4 999 AZN civarındadır.
MacBook-un seçimi oxuduğunuz ixtisasdan da asılıdır. Ədəbiyyat, Biznes və ya Psixologiya kimi texniki cəhətdən yüngül sahələrdə ucuz Windows noutbukları və ya Chromebook kifayət edə bilər. Amma dizayn, fotoqrafiya, film və proqramlaşdırma kimi sahələrdə güclü MacBook modelləri tələb olunur.
Apple ekosistemi də tələbələr üçün üstünlükdür – iPhone və iPad ilə sinxron işləmək, iCloud vasitəsilə sənədlərə asanlıqla giriş imkanı yaradır. Lakin seçim etməzdən əvvəl fakültənizin tələb etdiyi proqram təminatını mütləq yoxlamaq lazımdır, çünki bəzi proqramlar yalnız Windows-da işləyə bilər.