Mütəxəssislər səhər saatlarında süd və süd məhsullarının qəbulunu sağlam həyat tərzinin vacib tərkib hissəsi kimi dəyərləndirirlər. Günə süd və ya süd məhsulları ilə başlamaq orqanizmin enerji balansını tənzimləyir, immunitet sistemini gücləndirir və gündəlik fəaliyyət üçün zəruri vitamin-minerallarla təmin edir.
“Tehsil365” xəbər verir ki, süd kalsium, fosfor, D və B qrupu vitaminləri ilə zəngindir. Bu elementlər sümük və diş sağlamlığının qorunmasında mühüm rol oynayır. Səhər qəbul edilən süd maddələr mübadiləsini sürətləndirir və diqqət toplama qabiliyyətini artırır.
Qatıq və pendir kimi süd məhsulları isə probiotik təsir göstərərək həzm sisteminin fəaliyyətini yaxşılaşdırır. Xüsusilə təbii qatıq bağırsaq mikroflorasını dəstəkləyir, immun sistemini gücləndirir və gün ərzində mədə-bağırsaq problemlərinin qarşısını alır.
Mütəxəssislər bildirirlər ki, süd və süd məhsullarını səhər yeməyinə daxil etmək balanslı qidalanmanın əsas şərtlərindən biridir. Bu vərdiş həm böyüklərin, həm də uşaqların gündəlik enerji tələbatını qarşılayır və sağlam həyat tərzinə müsbət təsir göstərir.