Birləşmiş Ərəb Əmirliklərinin Dubay şəhərində dünyanın 3000-dən çox muzey mütəxəssisinin iştirakı ilə ICOM-un “Sürətlə dəyişən icmalarda muzeylərin gələcəyi” devizi altında 27-ci Baş konfransı keçirilib.
“Tehsil365” AZƏRTAC-a istinadla xəbər verir ki, konfransın proqramına ondan çox əsas sessiya, 400-dən çox natiq, 100-dən artıq çıxış, panel, seminar və interaktiv təlimlər daxildir.
Tədbirdə ICOM Azərbaycan Milli Komitəsinin sədri, “Azərxalça” ASC-nin İdarə Heyətinin üzvü Əsmər Babayeva, Mədəniyyət Nazirliyinin nümayəndələri, bir sıra muzey direktorları və digər nümayəndələr iştirak ediblər.
Əsmər Babayeva 2023–2025-ci illərdə ICOM Azərbaycan Milli Komitəsinin fəaliyyəti, ölkənin muzey həyatında yeniliklər, təşkil olunan tədbirlər və beynəlxalq əməkdaşlıq barədə məlumat verib. O bildirib ki, muzeylər maddi və qeyri-maddi irsi toplayan, qoruyan və cəmiyyətə təqdim edən, açıq və inklüziv fəaliyyət göstərən qurumlardır.
Konfrans digər ölkələrin çıxışları ilə davam edib.
Qeyd edilib ki, ICOM-un üç ildən bir keçirilən Baş konfransı bu il ilk dəfə Yaxın Şərq, Afrika və Cənubi Asiya regionunda təşkil olunub. Bu tədbir beynəlxalq muzey ictimaiyyətinin fikir mübadiləsi və əməkdaşlığının genişləndirilməsinə xidmət edir.