Azərbaycan Dillər Universitetinin Azərbaycan ədəbiyyatı kafedrası Doktorantura şöbəsi ilə birgə seminar keçirilib. Seminarda Azərbaycan ədəbiyyatı kafedrasının müəllimi f.f.d., dosent Aytac Zeynalova “Mədəni-tarixi metod” mövzusunda geniş məruzə ilə çıxış edib. Məruzə mədəni-tarixi metodun yaranma tarixi, əsas prinsipləri, nəzəri mənbələri və ədəbiyyatşünaslıqda tutduğu yer kimi mövzulara həsr olunub.
“Tehsil365” bildirir ki, məruzədə mədəni-tarixi metodun nəzəri əsasları, onun ədəbiyyatşünaslıqda tətbiq imkanları və digər metodlarla müqayisəsi ətraflı şəkildə izah edilib. Aytac Zeynalova mədəni-tarixi metodun mahiyyətini izah edərkən bildirib ki, bu metod ədəbi əsərin yarandığı dövrün tarixi, ictimai və mədəni mühiti ilə sıx əlaqədə öyrənilməsini əsas götürür. Seminarda mədəni-tarixi metodun ədəbiyyatşünaslıqda bədii mətnin ideya-məzmun xüsusiyyətlərinin, müəllif dünyagörüşünün və dövrün sosial reallıqlarının müəyyənləşdirilməsində mühüm elmi əhəmiyyətə malik olduğu xüsusi olaraq qeyd edilib.
Sonda seminar iştirakçıları mövzu ətrafında müzakirələr aparmış, mədəni-tarixi metodun müxtəlif ədəbiyyat nümunələrinə tətbiqi ilə bağlı fikir mübadiləsi edilib. Seminar doktorantlar üçün metodoloji biliklərin dərinləşdirilməsi baxımından əhəmiyyətli olub, ədəbiyyatın sosial aspektlərdən araşdırılması istiqamətində yeni elmi suallar ortaya çıxarıb.