Azərbaycanda şəhər yerlərində fəaliyyət göstərən ümumtəhsil məktəblərində çalışan müəllimlərin sayı son 20 ildə təxminən 10 min nəfər azalıb.
“Tehsil365”in Dövlət Statistika Komitəsindən əldə etdiyi məlumaya görə, 2005–2006-cı tədris ilində şəhər ümumtəhsil müəssisələrində əsas heyət üzrə 87 min 782 müəllim çalışdığı halda, 2024–2025-ci tədris ilində bu göstərici 78 min 107 nəfərə düşüb. Beləliklə, son 20 ildə müəllimlərin sayı 9 min 675 nəfər azalıb.
Statistika göstərir ki, müəllimlərin sayında azalma fonunda şəhər məktəblərində təhsil alan şagirdlərin sayı artıb. Belə ki, 2005–2006-cı tədris ilində şəhər məktəblərində 833 min 500 şagird təhsil aldığı halda, 2024–2025-ci tədris ilində onların sayı 1 milyon 98 min 432 nəfərə yüksəlib.
Eyni dövrdə şəhər ümumtəhsil müəssisələrinin sayı da 1156-dan 1261-ə çatıb. Liseylərin sayı 62-dən 120-yə, gimnaziyaların sayı isə 6-dan 30-a yüksəlib.