24 iyul 2025-ci il tarixində Banqladeşin Dəkkə şəhərində yerləşən Universitet Qadınlar Federasiyası Kollecində “Milli Universitetə bağlı kollec tələbələrinin psixi sağlamlıq fərqindəliyi və özünəinamının artırılması” adlı bir günlük seminarın bağlanış mərasimi keçirilib.
"Tehsil365" "The Business Standard"ın yaydığı məlumata əsasən bildirir ki, Tədbirdə çıxış edən Milli Universitetin prorektoru professor Dr. ASM Amanullah, tələbələrin psixi sağlamlığının keyfiyyətli təhsilin təməl daşı olduğunu vurğulayıb:
“Təhsilin keyfiyyətini artırmaq üçün tələbələr arasında psixi sağlamlıq haqqında maarifləndirməni gücləndirməkdən başqa yol yoxdur. İnkişaf etmiş ölkələrdə rəsmi təhsil yanaşı, psixi sağlamlığa da xüsusi önəm verilir.”
Professor Amanullah qeyd edib ki, Milli Universitet müasir dünyaya uyğun bacarıqlar qazandırmaq üçün kurikulum islahatları, İKT əsaslı təhsil və digər təşəbbüslər həyata keçirir. Təşkilat UNICEF, NSDA və a2i kimi yerli və beynəlxalq qurumlarla əməkdaşlıq memorandumu (MoU) imzalayaraq, tələbələrin qlobal əmək bazarına hazırlanmasına töhfə verməyi hədəfləyir.
Seminarda iştirak edən Banqladeş hökumətinin baş müşaviri və mətbuat katibi Mohammad Shafiqul Alam təşəbbüsü yüksək qiymətləndirərək, psixi sağlamlığın tələbələrin yaradıcılıq və tənqidi düşünmə bacarıqları üçün vacib olduğunu vurğulayıb:
“Bu təşəbbüs vaxtında və olduqca önəmlidir.”
Təlimlər Dəkkə Universitetinin Klinik Psixologiya, Kütləvi Kommunikasiya və Jurnalistika və Çoxşaxəli Təhsil Mərkəzinin Uşaq Psixologiyası üzrə tanınmış professor və mütəxəssisləri tərəfindən aparılıb. Tədbir Milli Universitetin Müəllim Hazırlığı Departamentinin müdiri Salma Parveen tərəfindən təşkil olunub.
Seminarda 160 tələbə iştirak edib. Onlar streslə mübarizə yollarını öyrənib, özünəinamı artıran məşqlərdə iştirak edib və qrup müzakirələri vasitəsilə şəxsi çətinlikləri və dəstək mənbələrini müəyyən ediblər. Tədbirin sonunda kurs iştirakçılarına sertifikatlar təqdim olunub.