Paytaxtdakı 171 nömrəli tam orta məktəbin direktoru Zemfira Məsiyevaya məxsus olduğu iddia edilən səs yazısı və onun müəllimlərə qarşı uyğunsuz davranışı ilə bağlı yayılan məlumatlara Bakı Şəhəri üzrə Təhsil İdarəsi (BŞTİ) münasibət bildirib.
İdarədən verilən məlumata görə, məsələ ilə bağlı araşdırma aparılması nəzərdə tutulur. Bu barədə Bakı Şəhəri üzrə Təhsil İdarəsi “Tehsil365”ə bildirib. Bildirilib ki, hazırda məktəbin pedaqoji heyəti məzuniyyətdə olduğu üçün araşdırma məzuniyyət dövründən sonra həyata keçiriləcək.
Qurumun açıqlamasında vurğulanıb ki, təhsil müəssisələrində istənilən neqativ hal yolverilməzdir:
“Məktəblərdə sağlam işgüzar mühitin təmin olunması, təhsil müəssisələrinin fəaliyyətində səmərəliliyin artırılması əsas prioritetlərdəndir. Məktəbin və müəllimin fəaliyyətinə uyğun olmayan hallara qarşı qanunvericiliyin tələbləri çərçivəsində müvafiq tədbirlərin görülməsi diqqət mərkəzində saxlanılır”,-deyə Bakı Şəhəri üzrə Təhsil idarəsindən qeyd olunub.