Azərbaycanda orta məktəblərdə bədən tərbiyəsi dərsləri uzun illərdir ki, əsas fənlərdən biri sayılsa da, ona münasibət çox zaman formal xarakter daşıyır. Bir çox şagird və valideynlər bu dərsi "dərs olmayan dərs" kimi qiymətləndirir, müəllimlər isə imkan və şərait çatışmazlığından şikayət edirlər.
“Tehsil365” xəbər verir ki, paytaxt məktəblərinin bəzilərində idman zalları mövcud olsa da, ya texniki baxımdan istifadəyə yararsızdır, ya da təmirə ehtiyacı var. Rayon məktəblərində isə vəziyyət daha da acınacaqlıdır bəzi məktəblərdə ümumiyyətlə idman zalı yoxdur, dərslər açıq havada və ya sinif otağında keçirilir.
Müasir dövrdə sağlam həyat tərzinin təbliği ön planda olsa da, məktəblərdə bədən tərbiyəsi dərslərinə maraq aşağıdır. Bunun bir səbəbi də bəzi müəllimlərin və şagirdlərin bu dərsi sadəcə formal keçməsi, bəzən də tamamilə keçməməsidir. Valideynlərin də bu məsələdə passivliyi vəziyyəti dəyişmir.
Mütəxəssislər vurğulayırlar ki, bədən tərbiyəsi dərsləri uşaqların yalnız fiziki deyil, eyni zamanda psixoloji və emosional sağlamlığı üçün də olduqca vacibdir. Müntəzəm fiziki hərəkət:
ürək-damar sistemini möhkəmləndirir,
artıq çəkidən və piylənmədən qoruyur,
sümük və əzələ sisteminin sağlam inkişafını təmin edir,
diqqət və yaddaşı gücləndirir,
stress və aqressiyanı azaldır,
komanda ruhu və liderlik bacarığı formalaşdırır.
Araşdırmalara görə, hərəkətli həyat tərzi sürən uşaqlar məktəbdə daha uğurlu nəticələr göstərir və sosial bacarıqları daha inkişaf etmiş olur.
Təhsil ekspertləri məktəblərdə idman dərslərinin praktik və interaktiv formada keçirilməsini, müəllimlərin bu sahədə əlavə təlimlərə cəlb olunmasını və məktəblərin texniki bazasının gücləndirilməsini vacib sayırlar. Eyni zamanda, valideynlərin də bu prosesdə aktiv rolu önə çəkilir.