Müasir dünyada uşaqlar və yeniyetmələr yalnız fiziki yox, eyni zamanda ciddi psixoloji təzyiqlərlə üz-üzədirlər. Artıq bu yaş qrupunun qarşılaşdığı sosial və emosional problemlər cəmiyyətin diqqət mərkəzinə çevrilməkdədir. Ailə münasibətləri, məktəb həyatı, akademik gözləntilər, sosial mediada qəbul olunmaq arzusu və rəqəmsal asılılıqlar onların psixoloji durumuna birbaşa təsir edir.
“Tehsil365” xəbər verir ki, mütəxəssislər bildirirlər ki, bu gün uşaqlarda və yeniyetmələrdə stress, təşviş, depressiya kimi hallar əvvəlki illərlə müqayisədə daha erkən yaşlarda müşahidə olunur. Xüsusilə sosial media platformalarında bəyənilmə və təsdiqlənmə ehtiyacı gənclərin özünüqiymətləndirməsinə mənfi təsir göstərir. Valideyn və müəllimlərin gözləntiləri isə onlarda "kifayət qədər yaxşı olmamaq" hissini gücləndirir.
Psixoloqlar hesab edirlər ki, uşaqların psixoloji sağlamlığını qorumaq üçün ən vacib məqam onlara emosional dəstək vermək və empatik yanaşmaqdır: "Uşaqlar özlərini dəyərli və dinlənilən hiss etdikdə, onlar psixoloji cəhətdən daha möhkəm böyüyürlər."
Bəs bu vəziyyətdə nə etməli?
Mütəxəssislər ailələrə və təhsil müəssisələrinə çağırış edirlər: daha çox dinləyin, daha az tənqid edin. Uşaqların duyğularını ifadə etməsi üçün onlara açıq və təhlükəsiz mühit yaradın. Sosial mediadan istifadənin miqdarına və məzmununa nəzarət edin. Unutmayaq ki, sağlam cəmiyyətin təməli psixoloji baxımdan güclü gənclərlə qurulur.