Müasir uşaqların həyatında texnologiya getdikcə daha çox yer tutsa da, bu rahatlığın arxasında gizlənən ciddi təhlükələr var. Uşaqların uzun müddət rəngarəng ekran qarşısında olması onların diqqətini və qavrama qabiliyyətini zəiflədir, gələcəkdə isə öyrənmə çətinliklərinə yol açır.
Psixoloq Aygün Məlikova, "Tehsil365" -ə verdiyi açıqlamada bildirir ki, rənglərin və sürətli dəyişən görüntülərin çoxluğu uşağın beynini passivləşdirir və onun diqqətinin səthi, qısa müddətli olmasına səbəb olur. “Uşaq ətraf mühitdə baş verənləri dərindən dərk edə bilmir, diqqəti fasilələrlə və qısa müddətə yayılır,” deyə o əlavə edir.
Bu vəziyyət uşaqların məktəb həyatına da mənfi təsir göstərir. Dərslərdə diqqətin toplanmaması, öyrənmə qabiliyyətinin zəifləməsi valideynlərin və müəllimlərin ən çox narahat olduğu mövzulardandır. Uşaqların ekran qarşısında sərf etdiyi vaxt artdıqca, onların real həyatda sosial və akademik bacarıqları da ləngiyir.
Ekran qarşısında olan uşaqların nitq və dil inkişafında da gerilik müşahidə olunur. Çünki burada danışıq monoton və qarşılıqlı deyil, uşaq passiv dinləyicidir. Onun söz ehtiyatı və cümlə qurma qabiliyyəti zəifləyir, bu da uzun müddətdə kommunikasiya problemlərinə səbəb ola bilər.
Mütəxəssislər valideynlərə çağırış edir: uşaqların ekran istifadəsini ciddi nəzarət altına alın, xüsusilə də 3 yaşdan kiçik uşaqların ekranla təmasından qaçının. Uşaqlara real oyun, kitab oxuma və birgə ünsiyyət imkanları yaradın ki, onların diqqəti və qavrama qabiliyyəti sağlam inkişaf etsin.