Uşaqların psixoloji inkişafında izlədikləri məzmunun rolu olduqca böyükdür. Xüsusilə 6-7 yaşına qədər olan uşaqlar gördükləri hər şeyi real qəbul edir və bunun fərqində olmaya bilirlər. Bu səbəbdən onlara təqdim olunan videolar və sosial media məzmunları onların davranış və düşüncə tərzinə dərin təsir göstərə bilər.
Psixoloq Aygün Məlikova, "Tehsil365"ə verdiyi açıqlamada bildirir ki, bu yaş dövründə uşaqlar hadisələri real kimi qəbul edir və izlədikləri materialların bəzən zərərli təsirləri ola bilər:
“Uşaqlar 6-7 yaşına qədər gördükləri hər şeyi gerçək kimi qəbul edirlər. Əgər videolar şiddət, qorxu və ya yaşlarına uyğun olmayan məzmunlar ehtiva edirsə, bu, onların psixikasında travmatik təsirlər yarada bilər,” deyə o qeyd edir.
Mütəxəssis vurğulayır ki, valideynlər uşaqların izlədiyi videoları diqqətlə seçməli və nəzarətdə saxlamalıdırlar. Artıq rəqəmsal dövrdə internetdə uşaqlar üçün nəzərdə tutulmayan məzmunların rahatlıqla qarşılarına çıxması ehtimalı yüksəkdir və bu, onların davranışlarında mənfi dəyişikliklərə səbəb ola bilər.
Aygün xanımın fikrincə, uşaqların baxdıqları videoların sağlam və inkişaf etdirici olması onların düzgün dünyagörüşü formalaşdırmasında vacib amildir. Bu səbəbdən valideynlərin sosial media və onlayn məzmun üzərində diqqətli nəzarət aparmaları zəruridir.