Yetkinlik yaşına çatmayanlara siqaret, spirtli və energetik içkilərin satışı qanunla qadağandır. Buna baxmayaraq, bəzi satış obyektlərində bu qaydanın pozulduğu hallara rast gəlinir. Daxili İşlər Nazirliyi bu məsələ ilə bağlı mütəmadi nəzarət tədbirləri həyata keçirdiyini bildirir.
DİN-in Mətbuat Xidmətinin əməkdaşı Elbrus İbrahimovun "Tehsil365"ə verdiyi açıqlamaya görə, azyaşlılara bu cür məhsulların satışının qarşısının alınması istiqamətində polis əməkdaşları tərəfindən nəzarət-profilaktik tədbirlər keçirilir:
“Polis əməkdaşları tərəfindən yetkinlik yaşına çatmayanlara etil spirti, alkoqollu və energetik içkilərin və ya tütün məmulatlarının satışının qarşısı almaq məqsədilə mütəmadi olaraq nəzarət profilaktik tədbirlər keçirilir. Qeyd etmək lazımdır ki, yetkinlik yaşına çatmayanlara tütün məmulatı almaqla, verməklə, tütün məmulatından istifadəni təklif və ya tələb etmək yolu ilə onların tütündən istifadə prosesinə cəlb edilməsi qanunla qadağandır və həmin şəxslər barəsində İnzibati Xətalar Məcəlləsinin müvafiq maddəsi ilə inzibati tənbeh tədbiri tətbiq edilir”.
Elbrus İbrahimov həmçinin əlavə edib ki, məhsulu satan şəxslər alıcının yaşı ilə bağlı şübhəyə düşdükləri halda onun şəxsiyyətini təsdiq edən sənəd tələb etməlidirlər:
“Həmin məhsulları satan şəxslərdə onlardan tütün məmulatı və spirtli içki alanın azyaşlı olduğu barədə şübhə yaranarsa, satışı dayandırmalı, həmin müştəridən şəxsiyyəti təsdiq edən sənəd tələb etməlidirlər. Sənəd təqdim etmədikdə həmin şəxsə tütün məmulatı və spirtli içki satılmamalıdır”.
Qeyd edək ki, İnzibati Xətalar Məcəlləsinə əsasən, bu qaydanı pozan fiziki və hüquqi şəxslər inzibati məsuliyyət daşıyır. Nazirlik bir daha vətəndaşları və satıcıları mövcud qanunlara əməl etməyə çağırır.