Sosioloq Üzeyir Şəfiyev “Tehsil365”ə bildirib ki: “Son illər Azərbaycan cəmiyyətində qızların xaricdə təhsilə marağında kəskin artım müşahidə olunur”
“Biz 20-30 il əvvəllə müqayisə etdikdə görürük ki, əksinə, indi Azərbaycandan xaricə təhsil dalınca gedən qızlarımızın statistikasında çox böyük artım var. 30 il əvvəl bu mənzərəni təsəvvür belə edə bilməzdik. Çünki Azərbaycan cəmiyyəti kişi cəmiyyətli olduğu üçün qız uşaqlarına oğlanlardan fərqli yanaşılırdı. Amma indi görürük ki, xaricə təhsil üçün gedən qızların sayında həndəsi artım var”.
O qeyd edib ki, bəzi valideynlər hələ də bu məsələyə mühafizəkar yanaşır:
“Bu da başadüşüləndir. Valideyn övladına görə nigaran qalır. Düşünür ki, qız uşağı xaricdə müxtəlif təzyiqlərə məruz qala bilər. Belə fikirləşən kişilər də var. Amma nəzərə almaq lazımdır ki, qız və oğlan fərq etməz – onlara düzgün tərbiyə verilməlidir, dünyagörüşü formalaşmalıdır. Harada olmasından asılı olmayaraq, insan özünü qorumalı, milli-mənəvi və ailə dəyərlərinə sadiq olmalıdır”.
Sosioloqun fikrincə, bu sahədə Azərbaycanda xeyli irəliləyiş əldə olunub:
“Artıq biz tam əminliklə deyə bilərik ki, bu istiqamətdə cəmiyyətimizdə ciddi inkişaf var. Statistik göstəricilər artımı sübut edir. Düzdür, bəzi valideynlər hələ də köhnə yanaşma sərgiləyir, amma bu, onların narahatlığından irəli gəlir. Zamanla bu düşüncənin də dəyişəcəyinə inanırıq. Azərbaycan bu istiqamətdə artıq xeyli irəliləyib”,- deyə sosioloq qeyd edib.