Azərbaycanda məktəblərdə şagirdlərin təhlükəsizliyinin təmin olunması təhsil sisteminin əsas prioritetlərindən biri olmalıdır. Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli “Tehsil365”ə bildirib ki, təhlükəsizlik yalnız fiziki deyil, eyni zamanda psixoloji, sosial və emosional mühitin də sağlam şəkildə təşkilini əhatə etməlidir.
Təhsil ekspertinin sözlərinə görə, bəzi məktəblərdə kamera sistemləri, giriş-çıxış rejimi və mühafizə xidmətləri tətbiq olunsa da, bu tədbirlər hər yerdə eyni səviyyədə həyata keçirilmir. Xüsusilə region məktəblərində maliyyə və texniki imkanların məhdudluğu səbəbilə ciddi çatışmazlıqlar mövcuddur.
"Psixoloji zorakılıq, mobbinq və müəllim-şagird münasibətlərində zorbalıq kimi hallara qarşı məktəblərdə sistemli tədbirlər görünmür. Psixoloqların sayı azdır, bir psixoloq onlarla sinfə cavabdeh olur ki, bu da real dəstəyə imkan vermir", – deyə Əmrah Həsənli qeyd edib.
Təhsil eksperti əlavə edib ki, fövqəladə hallara hazırlıqla bağlı məktəblərdə prosedurlar adətən yalnız kağız üzərində qalır və real məşqlər nadir hallarda keçirilir.
Sonda təhsil eksperti vurğulayıb ki: “Təhlükəsizlik yalnız inzibati tənzimləmələrlə deyil, məktəb mədəniyyəti, valideyn və müəllim məsuliyyəti, eləcə də şagirdlərin maarifləndirilməsi ilə təmin oluna bilər.”
“Gələcəkdə bu sahədə hüquqi, texniki və maarifləndirici istiqamətdə daha sistemli və ardıcıl addımlar atılmalıdır.”- deyə Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli bildirib.