“Rəqəmsal dünyada uşaqları qorumaq valideynlər üçün getdikcə çətinləşir. YouTube, TikTok və digər platformalarda hər nə qədər "uşaq üçün" etiketlənmiş videolar olsa da, bəzi hallarda onların arasında animasiya şəklində təqdim olunan, lakin +18 məzmunlu videolara da rast gəlinir. Bu isə uşaqların psixoloji inkişafı üçün ciddi təhlükə yaradır.”
Psixoloq Aygün Məlikova, “Tehsil365”ə verdiyi açıqlamasında bu məsələyə xüsusi diqqət çəkir:
“Valideynlər düşünür ki, uşaq animasiya izləyir deyə, narahat olmağa dəyməz. Amma təəssüf ki, bəzi hallarda bu animasiyalar cizgi formasında olsa da, içində yaşa uyğun olmayan, və ya aqressiv mesajlar ola bilər. Uşaq bu görüntüləri real həyatla qarışdırır və bu, onun davranışlarında gözlənilməz dəyişikliklərə səbəb olur,” deyə o xəbərdarlıq edir.
Uşaqlar 6-7 yaşına qədər gördükləri hər şeyi real qəbul etdiklərinə görə, bu cür görüntülər onların düşüncə sisteminə birbaşa təsir edir. Hətta onlar bu obrazları oyuncaqlarla canlandırmağa, danışdıqları söhbətlərə daxil etməyə və ya davranışlarına yansıtmağa başlayırlar. Aygün xanımın fikrincə, belə bir vəziyyətdə uşağın tərbiyəsində təkcə ailə deyil, cəmiyyət və rəqəmsal platformaların da rolu böyükdür.
O bildirir ki, bu cür məzmunlarla qarşılaşan uşaqlarda özünə güvən azalır, qorxu və aqressiya halları artır və onlar müdafiə mexanizmini şiddət əsasında formalaşdırmağa başlayırlar. Valideynlər bəzən uşağın anidən kobudlaşdığını, qəribə sözlər işlətdiyini və ya "yetişkin" davranışlar sərgilədiyini müşahidə edirlər bu, çox zaman izlədiyi videoların nəticəsidir.
Ekranda gördüyümüz hər animasiya "uşaq məzmunu" deyil. Aygün Məlikova tövsiyə edir ki, valideynlər uşaqlarının baxdığı məzmunlara nəzarəti gücləndirsin, onların hansı videoları izlədiyini birlikdə yoxlasın və mümkün qədər alternativ təbii, interaktiv və emosional inkişafı dəstəkləyən fəaliyyətlərlə onları əvəz etsinlər.