Cəmiyyətin və məktəb mühitinin bir çoxunda sakit, tərbiyəli, problemsiz görünən uşaqlar nümunəvi kimi təqdim olunur. Amma bəzi hallarda bu səssizlik və itaətkarlıq, uşağın içində gizlədiyi narahatlığın və qorxuların əlaməti ola bilər.
“Tehsil365”in verdiyi məlumata əsasən, psixoloqlar qeyd edirlər ki, bəzi uşaqlar öz duyğularını ifadə etməyi öyrənmədiklərindən susmağa və yalnız daxildə yaşamağa meyilli olurlar. Onların “problemsiz” görünməsi, əslində, daxili basqı və özünüifadə bacarığının zəifliyi ilə bağlı ola bilər. Bu uşaqlar məktəbdə itaətkar, evdə isə sakit və öz dünyasında olur, lakin böyüdükcə depressiya, sosial fobiya və qərarsızlıq hallarıyla qarşılaşa bilirlər.
Mütəxəssislər bu cür uşaqlarla bağlı həm valideynləri, həm də müəllimləri diqqətli olmağa çağırır. Uşaq sakitdirsə, bu, hər zaman onun yaxşı olduğu anlamına gəlmir. Əksinə, bu səssizlik arxasında çox şey gizlənə bilər.