İxtisas seçimi dövründə sosial şəbəkələrdə və müxtəlif platformalarda özünü “ixtisas seçimi mütəxəssisi” kimi təqdim edən şəxslərin sayı artıb. Onların bəziləri isə bu işi qeyri-peşəkar və maddi maraqla həyata keçirirlər. Məsələ ilə bağlı təhsil eksperti Elçin Süleymanov “Tehsil365”ə açıqlamasinda bildirib. Vacib məqamlara toxunaraq abituriyentləri və valideynləri diqqətli olmağa çağırır.
Ekspert bildirir ki, ixtisas seçimi, xüsusilə də 150-200 baldan yuxarı nəticə göstərən abituriyentlər üçün çətin bir proses deyil:
“Əvvəlki illərin keçid balları, Abituriyent jurnalının son buraxılışı bu prosesi olduqca asanlaşdırır. Ödənişli şəkildə kiməsə seçim etdirməyə ehtiyac yoxdur, bu kifayət qədər avtomatlaşdırılmış və əlçatan bir prosesdir.”
O qeyd edir ki, həm orta təhsil müəssisələrində, həm də Dövlət Məşğulluq Agentliyi çərçivəsində karyera planlaması ilə bağlı dəstək xidmətləri göstərilir. Bu imkanlardan istifadə tamamilə pulsuzdur.
“İnsanlar artıq texnologiyalardan – o cümlədən süni intellektdən – istifadə etməklə öz ixtisas seçimlərini daha düzgün şəkildə planlaya bilərlər. Mobil telefonla, süni intellekt tətbiqləri ilə bu prosesə rahatlıqla nəzarət etmək olur.”
Ekspert eyni zamanda saxta “ekspertlərə” qarşı diqqətli olmağı tövsiyə edir:
“Bəzən heç bir real təcrübəsi olmayan, iş fəaliyyətinə başlamamış şəxslər özünü karyera üzrə ekspert kimi təqdim edir. Əsl mütəxəssis – uzunmüddətli əmək təcrübəsi olan, tətbiqləri, fəaliyyətləri və nəticələri ilə tanınan şəxsdir.”
Elçin Süleymanov valideynləri və abituriyentləri bu tip ödənişli reklam məsləhətlərindən uzaq durmağa, rəsmi və etibarlı mənbələrə əsaslanaraq seçim etməyə çağırır.