Son illərdə universitetə qəbul imtahanlarına hazırlıq prosesi bir çox abituriyent üçün psixoloji baxımdan ciddi yüklə müşayiət olunur. Ailə gözləntiləri, müəllimlərin təzyiqi və rəqabətli təhsil sistemi yeniyetmələrdə xroniki stress, yuxusuzluq, özünə güvənsizlik kimi problemləri artırır. Psixoloqlar bildirir ki, "Valideynlər bəzən uşağın emosional vəziyyətini nəzərə almadan yalnız nəticəyə fokuslanır. Bu isə onların psixi sağlamlığını zədələyə bilər".
“Tehsil365” xəbər verir ki, bəzi ailələrdə uşağın uğuru yalnız universitetə daxil olmaqla ölçülür. Bu isə abituriyentlərdə özünü ifadə etmə azadlığını, daxili rahatlığı və motivasiyanı azaldır. Əksər hallarda imtahan gününə yaxın psixoloji yüklənmə o qədər artır ki, uşaq heç normal fəaliyyət göstərə bilmir. Bəziləri baş ağrısı, mədə problemləri, ürək döyüntüləri, panik atak, hətta depressiya simptomları ilə üzləşir.
Mütəxəssislərin fikrincə, bu yaş dövrü yetkinliklə çarpazlaşdığı üçün emosional dayanıqlıq daha zəif olur. Əgər valideyn və müəllimlər bu dövrdə uşağa yalnız akademik nəticə üzərindən yanaşsalar, onun şəxsiyyət inkişafı və psixi durumu ciddi zərər görə bilər. Abituriyentlərin daha sağlam psixoloji durumla imtahanlara hazırlaşması üçün onlara mütəmadi istirahət, fiziki aktivlik, istədikləri hobbilərə vaxt ayırmaq və psixoloji dəstək almaq tövsiyə edilir.
Mütəxəssislər xəbərdarlıq edir: sağlam zehin olmadan uğur davamlı ola bilməz. Ona görə də nəticəyə deyil, prosesə və uşağın ruh halına diqqət etmək vacibdir.