Məktəb bufetlərində satılan “isti-isti” bulka, pizza və pirojki kimi məhsullar bir çox şagirdin sevimli yeməkləri olsa da, onların sağlamlığa təsiri düşündüyümüz qədər zərərsiz deyil. Gündəlik tərkibində bol miqdarda ağ un, doymuş yağlar və duz olan bu məhsullar uşaqlarda piylənmə, insulin müqaviməti və həzm problemlərinə yol aça bilər.
“Tehsil365” xəbər verir ki, mütəxəssislər bu cür qidaların məktəb yaşlı uşaqlarda piylənmə hallarını artırdığını, həmçinin sinifdə diqqət pozuntuları və enerji enişi kimi problemlərə səbəb olduğunu bildirirlər. Həkim-diyetoloqlar valideynlərə tövsiyə edir ki, uşaqlarına evdən daha balanslı və təbii məhsullarla dolu səhər yeməkləri və qəlyanaltılar hazırlasınlar. Bufet menyularının isə məktəb rəhbərliyi tərəfindən sağlamlıq meyarlarına əsasən tənzimlənməsi vacib sayılır. Uşaqlarda düzgün qidalanma yalnız fiziki sağlamlığı deyil, həm də zehni və akademik performansı birbaşa dəstəkləyir.