Yeniyetmələr arasında qulaqcıqla musiqi dinləmək adi hal alıb. İstər dərsdən sonra istirahət məqsədilə, istərsə də ictimai nəqliyyatda zaman keçirmək üçün istifadə edilən qulaqcıqlar, düşündüyümüz qədər günahsız deyil. Xüsusilə yüksək səsdə, uzun müddət qulaqcıqdan istifadə eşitmə orqanlarına təsirsiz ötüşmür.
“Tehsil365” xəbər verir ki, həkimlər artıq yeniyetmələr arasında eşitmə zəifliyinin artdığını deyirlər. Qulaqcıqla dinlənən musiqi yalnız eşitməyə deyil, eyni zamanda beynin diqqət toplama qabiliyyətinə də mənfi təsir göstərir. Baş ağrısı, diqqətsizlik və tez yorulma kimi simptomlar bu zərərin ilk əlamətləri kimi sayılır. Mütəxəssislər bildirirlər ki, uşaq və yeniyetmələrdə eşitmə pozuntularının qarşısını almaq üçün həm valideynlər, həm də müəllimlər bu vərdişlərə qarşı maarifləndirici yanaşma nümayiş etdirməlidirlər. Qısamüddətli musiqi dinləmələrində belə orta səslə istifadə tövsiyə olunur.