Müasir dövrdə uşaqların gündəlik həyatı getdikcə daha çox rəqəmsal cihazlarla dolur. Smartfon, planşet və kompüter qarşısında keçirdikləri vaxt əl işləri, boyama, kəsib-yapışdırma kimi toxunma duyğusunu inkişaf etdirən fəaliyyətlərdən uzaqlaşmalarına səbəb olur. Bu, uşaqların barmaq motorikasının zəifləməsinə gətirib çıxarır ki, bu da məktəb dövründə yazı yazmaq, rəsm çəkmək və müxtəlif praktiki tapşırıqları yerinə yetirmək qabiliyyətini zəiflədir.
“Tehsil365” xəbər verir ki, loqopedlər və inkişaf mütəxəssisləri uşaqların incə motorikasının inkişafı üçün toxunma duyğusunun gücləndirilməsini vacib sayırlar. Əl işləri və toxunma əsaslı oyunların azaldılması, əvəzinə ekran qarşısında çox vaxt keçirməsi uşaqların təxəyyülünü və əl koordinasiyasını mənfi təsir edir. Bu problemlər nəticəsində məktəblilər məktəb tapşırıqlarını yerinə yetirməkdə çətinlik çəkir, əl yazısı zəif olur və hətta bəzilərində özünüifadə problemləri yaranır.
Mütəxəssislər məktəblərdə və evlərdə daha çox praktik fəaliyyətlərin təşviq edilməsinin, uşaqların rəqəmsal texnologiyadan balanslı və məhdud istifadə etmələrinin vacibliyini vurğulayırlar. Valideynlərə tövsiyə olunur ki, övladlarını rəngləmə, modelləşdirmə, toxuma və digər əl bacarıqları tələb edən fəaliyyətlərə yönləndirərək toxunma duyğusunu inkişaf etdirsinlər.
Bu yanaşma yalnız fiziki inkişaf üçün deyil, həm də uşaqların zehni, emosional və sosial bacarıqlarının formalaşmasına müsbət təsir göstərir. Uşaqların toxunma duyğusunun zəifləməsi gələcəkdə daha geniş inkişaf problemlərinə səbəb ola biləcəyindən, bu sahəyə xüsusi diqqət yetirmək olduqca vacibdir.