Məktəbyaşlı uşaqların üzlərindəki saf təbəssümlər, təəssüf ki, artan diş problemləri ilə kölgələnir. Valideynlərin və müəllimlərin əsasən akademik göstəricilərə fokuslanması, uşaqların fiziki sağlamlığı xüsusilə də ağız və diş gigiyenasının arxa planda qalmasına səbəb olur. Halbuki ağız sağlamlığı təkcə estetik deyil, həm də ümumi sağlamlığın mühüm bir göstəricisidir.
“Tehsil365” xəbər verir ki, son illərdə məktəblilər arasında diş çürüməsi halları əhəmiyyətli dərəcədə artıb. Qidalanma vərdişləri bu məsələdə mühüm rol oynayır şəkərli içkilər, konfet, çips, paketlənmiş şirniyyatlar və təəssüf ki, məktəb bufetlərində satılan qazlı içkilər və fast-food tərzi qidalar diş minasını zəiflədərək erkən yaşlardan çürüməyə yol açır. Ən ciddi məsələ isə odur ki, uşaqların əksəriyyəti gündəlik diş fırçalama vərdişinə sahib deyil və bu sahədə maarifləndirici fəaliyyətlər azdır.
Tibb mütəxəssisləri bildirirlər ki, hər bir məktəbdə ildə azı bir dəfə stomatoloji müayinələrin keçirilməsi, diş fırçalama təlimləri və şagirdlər üçün praktik gigiyena dərslərinin təşkili çox vacibdir. Eyni zamanda valideynlər də bu məsələdə maariflənməli və uşaqlarına sağlam qidalanma, şirinlərin minimuma endirilməsi və diş gigiyenası qaydalarını öyrətməlidirlər. Uşaqlıqda atılan bu kiçik addımlar gələcəkdə bahalı və ağrılı stomatoloji problemlərin qarşısını almağa kömək edə bilər.