Son günlər həm ali təhsil müəssisələrinə, həm də kolleclərə ixtisas seçimi ilə bağlı ciddi gərginlik yaşanır.
Təhsil eksperti Məzahir Məmmədli "Tehsil365"ə bildirib ki, bu gərginliyin yaranmasında abituriyentləri cəlb etmək məqsədilə süni narahatlıq yaradan bəzi şəxslərin də rolu var:
"Azərbaycanda bu işin peşəkarları mövcuddur. Onlar əmək bazarını təftiş edib ümumi mənzərəni analiz edir və abituriyentlərə müvafiq xidmətlər göstərirlər. Təəssüf ki, qeyri-peşəkar şəxslər də bu məsələdə aktivdir və sosial şəbəkələr, xüsusilə TikTok vasitəsilə abituriyent və valideynlərdə süni panika yaradırlar."
Ekspert qeyd edib ki, bu il qəbul planında 5000 yer artırılıb ki, bu da daha çox abituriyentin qəbul oluna biləcəyi anlamına gəlir:
"Hətta 150 bal toplayanlar üçün də uyğun ixtisas seçimi mümkündür. Bu il daha çox gərginlik 3-cü qrup üzrə müşahidə edilə bilər. Pedoqoji ixtisaslara əlavə yer ayrılmayıb, əksinə bəzi ixtisaslarda azalma var. Məhz buna görə müəllimlik ixtisasına yüksək balla seçim edənlərin sayı artıb."
Məzahir Məmmədli qeyd edir ki, əvvəl 200-250 balla qəbul olanların əvəzinə bu il müəllimliyi seçmək üçün ən azı 500-650 bal toplamaq tələb oluna bilər:
"Bu, həm sevindirici, həm də bəzi abituriyentlərin həmin ixtisaslardan kənarda qalmasına səbəb ola bilər."