Bu il ali təhsil müəssisələrinin keçid ballarında artım gözlənilir. Xüsusilə də III ixtisas qrupunda bu artımın ciddi olacağı proqnozlaşdırılır.
Təhsil eksperti Elçin Əfəndi “Tehsil365”ə bildirib ki, pedaqoji yönümlü ixtisasların plan yerləri azaldılıb və bu da həmin istiqamətdə rəqabəti daha da artırıb:
“III ixtisas qrupunda sırf rəqabət mühiti var. Təxminən 15 min plan yerinə qarşı 28 mindən çox abituriyent elektron ərizə qəbulunda iştirak edib. Bu isə hazırkı vəziyyətdə 13 min nəfərdən çox şəxsin müsabiqədən kənarda qalacağı anlamına gəlir. Təbii ki, bu, bəzi ixtisasların keçid ballarının artması ilə nəticələnəcək. Çünki bu qrupda yüksək bal toplayan abituriyentlərin sayı kifayət qədər çoxdur.”
Ekspert əlavə edib ki, I ixtisas qrupu üzrə də eyni vəziyyət müşahidə edilir:
“I qrupu üzrə də rəqabət yüksəkdir. Burada da yüksək ballı abituriyentlərin sayı nəzərəçarpacaq dərəcədədir.”
O, həmçinin qeyd edib ki, IV ixtisas qrupunda da müəyyən qədər rəqabət var:
“Ümumilikdə I ixtisas qrupu, III qrupun IV ixtisas qrupu üzrə daha ciddi rəqabət gözlənilir.”
Elçin Əfəndi bildirib ki, II ixtisas qrupunda isə nisbətən daha əlçatan imkanlar var:
“Bu ixtisas qrupunda əvvəlki illərlə müqayisədə vəziyyət bir qədər fərqli ola bilər. Amma digər qruplarda bu il olduqca gərgin rəqabət mühiti formalaşıb.”