Son illərdə yeniyetmələr arasında energetik içkilərə maraq sürətlə artıb. Xüsusilə imtahan dövrlərində, gərginlik və yorğunluq hisslərini aradan qaldırmaq üçün bu içkilərə üz tutan məktəblilər, əslində sağlamlıqlarını ciddi təhlükə altına atırlar. Energetik içkilərin tərkibində yüksək miqdarda kofein və şəkər olması, onların uşaqlar və yeniyetmələr üçün riskli içkilər sırasına daxil edilməsinə səbəb olur.
"Tehsil365" xəbər verir ki, qidalanma üzrə mütəxəssislər energetik içkilərin xüsusilə inkişaf çağında olan yeniyetmələrin orqanizminə mənfi təsirlərindən narahatdırlar. Bu içkilər ürək döyüntüsünün sürətlənməsinə, tərləməyə, yuxusuzluğa və diqqət dağınıqlığına səbəb olmaqla yanaşı, sinir sistemini də uzunmüddətli zədələyə bilər. Araşdırmalar göstərir ki, mütəmadi olaraq energetik içkilərdən istifadə edən uşaqlarda aqressiya, əsəbilik və ani emosional partlayışlar daha çox müşahidə olunur. Mütəxəssislər məktəblərdə bu içkilərin satışının qadağan olunmasını, valideyn və şagirdlər arasında maarifləndirici kampaniyaların həyata keçirilməsini zəruri hesab edirlər.