Məktəbyaşlı uşaqların və yeniyetmələrin günə necə başladığı, onların həm psixoloji, həm də fiziki durumuna birbaşa təsir edir. Qida mütəxəssislərinin fikrincə, səhər yeməyi təkcə enerji mənbəyi deyil, eyni zamanda zehni fəaliyyətin, yaddaşın və emosional tarazlığın qorunması üçün əsas vasitədir. Səhər yeməyindən imtina edən şagirdlərdə gün ərzində yorğunluq, əsəbilik, diqqət yayınması və öyrənməyə marağın azalması kimi hallar müşahidə olunur. Bu isə tədris prosesinin effektivliyini zəiflədir.
"Tehsil365" xəbər verir ki, mütəxəssislər xüsusilə protein, lif və vitaminlərlə zəngin səhər yeməyini tövsiyə edirlər. Yumurtalı, yulaflı, pendirli və meyvəli menyular uşaqların məktəbə daha enerjili başlamasına kömək edir. Südlü içkilər, təbii şirələr və su balansının qorunması da diqqətdə saxlanmalıdır. Eyni zamanda, valideynlərin səhər yeməyini uşaqlara məcburi bir qayda yox, ailəvi bir vərdiş halına gətirməsi onların sağlam qidalanma davranışlarını formalaşdırmaqda mühüm rol oynayır.