Azərbaycan Ordusunda kadr hazırlığı sahəsində beynəlxalq əməkdaşlıq ildən-ilə güclənir. Müdafiə Nazirliyindən verilən məlumata görə, Azərbaycan hərbi təhsil müəssisələri bir sıra xarici ölkələrin ali məktəbləri ilə birgə proqramlar həyata keçirir.
Hazırda yüzlərlə azərbaycanlı kursant və zabit Türkiyə, Pakistan, İtaliya, ABŞ, Böyük Britaniya və digər dövlətlərin hərbi akademiyalarında təhsil alır. Onlar müxtəlif istiqamətlər üzrə – hərbi mühəndislik, aviasiya, logistika və idarəetmə sahələrində biliklər əldə edirlər.
Bununla yanaşı, Azərbaycanda keçirilən beynəlxalq təlimlərdə də xarici mütəxəssislərin iştirakı təmin edilir. Bu proses yerli zabitlərin döyüş hazırlığının artırılmasına, həmçinin NATO standartlarına uyğun bilik və bacarıqların mənimsənilməsinə imkan yaradır.
Rəsmi açıqlamalarda vurğulanıb ki, beynəlxalq əməkdaşlığın əsas məqsədi Azərbaycan Ordusunun müasir çağırışlara cavab verən peşəkar kadr potensialını formalaşdırmaqdır.